Relasaun inapropriadu entre mestre(a) ho estudante: buat ida normál iha Timor-Leste?

Cosme da Costa Araujo

 

Iha loron hirak liu ba ne’e, no até agora, ita rona ema koalia ou gosip, ita haré iha faceebook no lê iha blogs (hanesan-timorhauniadoben), no jornal sira, nebe’e diskonfia akontese aktu inapropriadu entre mestre ida ho ninia estudante. Iha tinan ida ne’e nia laran deit ita akompania akontesimentu hanesan aman “fo oan” ba nia oan rasik, germo nebe’e hetan kastigu tamba fasilita feto-ran ida ho “katuas riku”.

Ita hotu lamenta ba hahalok a’at hirak hanesan ne’e. Hahalok hirak nebe’e laos bai-bain, sa-tan halo husi ema hirak nebe’e mos laos bai-bain hanesan mestre(a). Hahalok hanesan ne’e laos maka foin akontese, maibe akontese dala barak tiha ona iha tipu oi-oin no sei akontese nafatin, sé kuandu ita hotu ho konsientemente husik deit hahalok a’at no lamentável hirak ne’e akontese nafatin.

 Husi reasaun oi-oin nebe’e ita hetan, hatudu momós katak ita hotu despreza, la-gosta, no lamenta hahalok a’at hirak ne’e. Hau só hakfodak no surpriendidu maka laiha reasaun ruma husi autoridades kompetentes hanesan Ministériu Edukasaun, Pais do Alunos, no Komisaun ba Labarik, PNTL no ulun konfisoens relijiozas sira. Keta halo ba sira hanoin buat a’at hirak hanesan ne’e “bai-bain tiha ona”, “biasa tiha deit”, ou “toman tiha ona”. Tamba ne’e sira “la-pusing”, hatene mas halo finji la hatene. Sé ita hanoin nune’e ou ita la foti medidas ruma forte hodi rezolve buat hirak ne’e, hau la hatene morál nasaun ida ne’e atu lao ba nebe’e lós. Ita kuda hela fini a’at ba ita oan no bei-oan sira katak hahalok a’at hirak hanesan ne’e “normal” iha Timor-Leste.

 Relasaun inapropriadu entre mestre(a) no estudante konsidera hanesan hahalok a’at tamba: Primeiru – mestre(a) nuda’ar “edukadór” ba alunu sira, laos deit iha materia eskolár nian – matemátika, fízika no sst, maibe mos iha dezenvolvimentu étika, morál, mentál ou psikik estudante nian. Nuda’ar edukadór, mestre(a) tenki ser sai hanesan “role model”, liu husi nia liafuan no hahalok. Role model ba nia estudante sira no mos nia kolegas mestre(a) sira seluk. Iha prosesu dezenvolvimentu, estudante sira sempre buka ema ida sai hanesan sira nia role model hodi fo dalan ba sira iha tempu ida nebe’e sira foin hasoru buat barak iha sira nia moris. Hanesan “role model” labele iha tohik ruma iha mestre(a) ninia personalidade liu-liu koalia no hahalok. Mestre(a) nia hahalok tenki ser hanesan ou han malu ho ninia koalia. Edukadór nebe’e diak sei hamosu mos estudante no foinsae nebe’e diak no vice-versa. Nune’e mos mestre(a) sai hanesan “aman ou inan” ou “orang-tua” ba estudantes iha eskola. Hanesan aman no inan sira sempre hanoin no halo buat nebe’e diak ba nia oan sira, laos “apro” fali sira.

 Sigundu – relasaun inapropriadu entre mestre(a) no estudante hanesan ho relasaun “ema bo’ot” ho “menór”. Ita nia lei rasik, liu-liu ita nia Kódiku Penál la permite no kriminaliza relasaun entre “ema bo’ot” ho “menór”. No maske estudante ne’e  tinan 18 ba leten no parte rua maka hakarak ou “mau sama mau” hodi halo relasaun  ne’e, maibe tamba iha enviromentu relasaun entre mestre(a) ho estudante, hahalok hanesan ne’e kategoriza inapropriadu nafatin. Hanesan kazu famozu ida akontese iha Estadus Unidus Ámerika, Sra. Amy McElhenney nebe’e hanorin iha Hebron High School, nia hetan kastigu tamba nia halo “relasaun inapropriadu” ho ninia estudante, maske estudante refere iha ona tinan 18 (iha EUA tinan 17 maka tinan legál konsiente ba relasaun seksual).

 Mestre(a), ho pozisaun, autoridade, no atributu sira seluk, bele direita ou indireita psikolojikamente influensia estudante hodi submete ou “submissive” ba mestre(a) nia hakaran. Wainhira estudante ida senti konfortável ou toman ou “nyaman” ona ho mestre(a) ida, psikolojikamente nia prontu (tamba seidauk hanoin ho rasionál) atu halo buat saida deit maka mestre(a) hakaran. Apalagi estudante sira nebe’e ladún iha domin husi aman-inan ou “broken home”, sira ne’e vulnerável liu. Iha tempu ida hanesan ne’e mestre(a) labele aproveita fali estudante nia fiar ou “kenyamanan” ou vulnerabilidade ba ninia interese pesoál. Sé iha provas nune’e duni, entaun ida ne’e tama ona iha “hahalok ho intensaun” atu halo “manipulasaun”, no ita Kódiku Penál kondena hahalok hanesan ne’e.

 Relasaun inapropriadu entre mestre(a) no estudante LAOS hahalok ida normál. Pelo contrario, ita bele dehan hahalok abnormál, nebe’e ita hotu lamenta. Se mestre(a) sai ona ameasa ba ita nia oan sira, se tan maka ita bele fiar?. Ita hotu, liu-liu parte kompetentes, labele taka matan, no la bele halo finji la hatene, se lae ita husi buat hirak ne’e sai tiha normál iha ita nia rai doben Timor-Leste. Se ita la hahú ohin, bainhira tan, se laos ita, se tan.